Herriarteko Eskuzko Txapelketaren finala ere ate joka da. Hain zuzen ere, finalerako txartelak izango dituzte jokoan asteburu honetan Oiartzunek eta Azpeitiak alde batetik, eta Ataunek eta Azkotiak bestetik. Azpeitiarrek 3-0eko aldeko emaitza lortu zuten joanekoan (22-16, 22-19, 22-9), eta azkoitiarrek 2-1ekoa (22-10, 22-15, 2-22). Baina ikusteko dago zer gertatuko den finalerdien itzulerakoetan.

Hauxe da, hain zuzen ere, asteburu honetarako kartelera:

Ekainak 22, ostirala

- 19:30, Oiartzun-Madalensoro: OIARTZUN / AZPEITIA

Ekainak 23, larunbata

- 19:00, Ataun-Auzoeta: ATAUN / AZKOITIA

Finala hilaren 30ean izango da, larunbata, 16:30ean, Donostiako Atano III.ean.

2018ko edizioan 18 herrik eman zuten izena eskuzko lehian, hauexek: Aia, Altzo, Andoain, Asteasu, Astigarraga, Ataun, Azkoitia, Azpeitia, Beasain, Bidania-Goiatz, Donostia, Errenteria, Hernani, Oiartzun, Oñati, Tolosa, Zizurkil eta Zumaia.

51. edizioa da aurtengoa eskuz.

Urte hauetan guztietan Azkoitiak jantzi ditu txapel gehien eskuko txapelketan, 16, hain zuzen ere (beste 6 aldiz izan da txapeldunorde); Donostia da bigarren palmaresean, 6 txapelekin (4 bider azpitxapeldun); eta Azpeitia hirugarren, 6rekin (3tan txapeldunorde).

Azpeitia berriro nagusituko balitz, lehendabiziko herria litzateke lau aldiz jarraian lehia irabazten.

Herriarteko Eskuzko Txapelketaren inguruko informazio guztia webgune honetako Lehiaketa-Federatua-Herriartekoa-Eskua atalean dago eskuragarri: https://bit.ly/2yuUos1