[EGUNERATZEA, 2023-10-23]

Gipuzkoa 1 izan da hirugarren Bote Luzeko Euskal Herriko Txapelketan, eta Gipuzkoa 2 sailkatu da laugarren postuan. Honela bukatu da bi taldeen arteko aurrez aurrekoa:

Gipuzkoa 1  7
Gipuzkoa 2  4

Bizkaia 1 taldeak irabazi du finala Bizkaia 2ren kontra, 6-5eko emaitzarekin.

Honela gelditu da, beraz, sailkapena:

1. Bizkaia 1
2. Bizkaia 2
3. Gipuzkoa 1
4. Gipuzkoa 2

Informazio gehiago, Euskadiko Euskal Pilota Federazioaren webgunean: www.euskalpilota.org

_______________________________________________________________________________________

[EGUNERATZEA, 2023-10-17]

Bote Luzeko VIII. Euskal Herriko Txapelketako 3. eta 4. postuak erabakitzeko norgehiagoka jokatuko dute Gipuzkoa 1 eta Gipuzkoa 2 taldeek, finalaren aurretik.

Larunbatean izango da aurrez aurrekoa, Getxoko (Bizkaia) Biotz Alai plazan, 16:00etan hasita. Eta ondoren jokatuko dute finala Bizkaia 1 eta Bizkaia 2 taldeek.

Eguraldi txarra egingo balu, bertan behera geldituko litzateke hitzordua.

Informazio gehiago, Euskadiko Euskal Pilota Federazioaren webgunean: www.euskalpilota.org

_______________________________________________________________________________________

Gipuzkoak agur esan dio Bote Luzeko Euskal Herriko Txapelketari. Bai Gipuzkoa 1ek bai Gipuzkoa 2k finalerdiak galdu dituzte Bizkaia 1 eta Bizkaia 2 taldeen aurka, hurrenez hurren. Eta, beraz, finala jokatzeko aukerarik gabe gelditu dira biak ala biak.

Oiartzungo Beheko plazan jokatu zituzten finalerdiak, pasa den jardunadian. Gipuzkoa 2k 4-8 galdu zuen Bizkaia 2 taldearen aurkako aurrez aurrekoa, ostiralean. Eta Gipuzkoa 1ek ere ezin izan zuen Bizkaia 1 mendean hartu igandean, eta 3-5 galdu zuen.

Hortaz, bizkaitarren arteko finala izango da zortzigarren ediziokoa. Hilaren 21ean jokatuko dute finala Bizkaia 2 eta Bizkaia 1 taldeek, Getxon.

Edizio batekoa izan ezik, orain arteko final guztiak zituen jokatuta Gipuzkoak, nahiz eta txapelik ezin izan duen oraindik lortu. Edizio guztietako finalak laburbildu ditugu koadro honetan:
 

Pilotari hauek osatu dute Gipuzkoa 1 taldea: Iñaki Esnal Aizpurua, Iraitz Irazu Eizagirre, Xuban Irazu Eizagirre, Andoni Urbieta Etxeberria, Ibai Urbieta Etxeberria, Jon Urbieta Otaegi eta Xabier Urbieta Otaegi.

Eta ondorengoek Gipuzkoa 2: Julen Chiapuso Nosellas, Xuban Goñi Del Rio, Axel Lasa Gelbentzu, Mikel Leonet Arozena, Manex Olaiz Etxeberria, Xabat Olaiz Etxeberria eta Iñigo Ugalde Muguruza.

Euskal Herriko 8 talde lehiatu dira aurtengo txapelketan, bi multzotan banatuta: Gipuzkoa 1, Bizkaia 2, Iparralde 1-Itsasu (Lapurdi) eta Iparralde 3-Senpere (Lapurdi) A multzoan; eta Gipuzkoa 2, Bizkaia 1, Iparralde 2-Milafranga (Lapurdi) eta Iparralde 4-Amikuze (Nafarroa Beherea) B multzoan.

Bote Luzea Euskal Herriko eta Europako pilota-joko modalitate bat da, joko zuzenen arteko zaharrena, eta ondoren sortu direnen oinarria eta funtsa. Euskal Herrian galdua bazegoen ere, azken urte hauetan berreskuratze prozesu batean sarturik dago.