Izen-emate gehiago zabaldu berri ditugu 2023-24ko denboraldirako teknifikazio proiektuan: emakumeentzat, gomazko paletakoa (ezker horman) eta paleta argentinarrekoa (trinketan); eta gizonentzat, eskuzkoa (trinketan). Guztientzat izena emateko azken eguna irailaren 22a, ostirala, izango da.

Emakumeen gomazko paletako (ezker horma) teknifikazio saioak Iruran eta Urnietan egitea aurreikusten da, asteartetan; 18:30etik 21:00etara Irurakoak, eta 20:00etatik 22:00etara Urnietakoak. Irurako saioak Jon Juanesek zuzenduko ditu, eta Urnietakoak Maider Mendizabalek.

Kadete kategoria eta goragoko pilotarien izenak eman ahal izango dituzte klubek. Izen-ematea aztertu ondoren, pilotari bakoitza zein egoitzetan ariko den Gipuzkoako Euskal Pilota Federazioak (GEPF) erabakiko du.

Izena emateko, albiste honi erantsitako dokumentua bete eta etxebe.pilota@kirolak.net helbide elektronikora bidali behar da, esan bezala, irailaren 22rako (13:00erako gehienez).

Saioekin urrian hastea da asmoa.

Emakumeen paleta argentinarreko (trinketa) teknifikazio saioak, bestalde, Iruran aurreikusten dira, astelehenetan, 21:00etatik 22:00etara. Maider Mendizabal izango da teknikaria.

Kasu honetan ere kadete kategoria eta gorako pilotarien izenak eman ahal izango dituzte klubek.

Horretarako, albiste honi erantsitako inprimakia bete eta etxebe.pilota@kirolak.net helbidera bidali behar da, irailaren 22rako (13:00 epe-muga).

Saioak urrian hastea aurreikusten da.

Gainera, paleta argentinarrean gero eta gutxiago jokatzen dela ikusiz, jokamoldea ezagutzeko saio batzuk antolatzeko asmoa du federazioak. Urritik hasita, hilean behin izango lirateke saio horiek, Donostiako Gaska trinketan (izen-emate orrian azaltzen dira data zehatzak). Kadete kategoria eta goragoko eta trinketeko teknifikazioan izena emanda ez dauden pilotarien izenak eman ahal izango dituzte klubek. Ez da ezinbestekoa izango saio guztietara azaltzea, baina bai eskatuko dela gutxienez bost saiotara agertzeko konpromisoa. Era berean, saio bakoitzera gutxieneko pilotari kopuruak agertu beharko du, bestela saioa bertan behera geldituko litzateke. Albiste honi erantsitako izen-emate orria bete eta etxebe.pilota@kirolak.net helbidera bidaliz egin behar da izen-ematea, irailaren 22rako (13:00).

Azkenik, mutilen eskuzko (trinketa) teknifikazio saioak Irurako trinketan izango dira, asteartetan, 20:00etatik 22:00etara. Eneko Maizek gidatuko ditu.

Trinketan inoiz partidaren bat jokatu duten kadete, jubenil eta 22 urtez azpiko pilotariei dago zuzenduta deialdia.

Kluben ardura izango da izena ematea, eta horretarako albiste honi erantsitako inprimakia bete eta etxebe.pilota@kirolak.net helbidera bidali behar dute, irailaren 22rako (13:00 baino lehen).

Aurrerago hasiberrientzat saioaren bat antolatzea ere aurreikusten dugu.